اسلام آباد – 31 جولاءِ (اي پي پي) وزيراعظم عمران خان چيو آهي ته 50 لک گهرن جي تعمير تمام وڏو منصوبو آهي، 10 سالن جي ڦرلٽ جي ڪري ملڪ ۾ پئسي جي کوٽ آهي، نئون هائوسنگ منصوبو آسان نه آهي، ان منصوبي ۾ جتي گهٽ آمدني واري طبقي کي پنهنجا گهر ملندا اتي ملڪ جي 40 صنعتن کي سڌوسنئون فائدو ٿيندو ۽ نوجوانن کي روزگار ملندو، نئون پاڪستان هائوسنگ منصوبي تحت گڏيل قومن جي پراجيڪٽ سروسز بابت آفيس ((يو اين او پي ايس) ۽ سسٽين ايبل هائوسنگ سلوشنز (ايس ايڇ ايس) پاران 5 لک گهر ٺاهڻ جي فيصلي تي انهن جا ٿورائتا آهيون. هو نئون پاڪستان هائوسنگ پروگرام لاءِ حڪومت، گڏيل قومن جي پراجيڪٽ سروسز بابت آفيس (يو اين او پي ايس) ۽ سسٽين ايبل هائوسنگ سلوشنز (ايس ايڇ ايس) جي وچ ۾ مفاهمت جي يادداشت تي صحيحن واري تقريب کي خطاب ڪري رهيو هو.
