نیویارک ۔21 ستمبر(اے پی پی) د ماحولياتي بدلون وفاقي وزيرې سېنېټر شېري رحمن په نيويارك كښې کلائمېټ اېنډ ډوېلپمنټ وزارتی غونډه كښې د پاكستان نمائندګي كړې ۔ دې د ملګرو ملتونو د عمومي اسمبلۍ غونډې په موقع د برطانيه او روانډا لخوا رابللې شوې غوندې ته خطاب وكړو۔ په خپل خطاب كښې وفاقي وزيرې ووئيل پاکستان د ماحوليات بحران په وړاندې په وړومبۍ کرښه ولاړ دے، نړۍ ته به بحث مباحثې نه پرته پرېكړې كول وي۔ دې ووئيل د ګرين هاؤس ګېسز په مجموعي اخراج كښې د پاكستان برخه د يو فيصد نه هم لږه ده ولې بيا هم چې مونږ د كومې كچې زيان پورته كوؤ د هغې اندازه نشي لګېدې۔ شېري رحمان ووئيل پاكستان كښې د ريكارډ بارانونو نه پس تاريخي سېلاب زياته تباهي كړې۔ د بارانونو او د سېلاب د لاسه په رامخې ته شوو بېلو پېښو كښې 1500 نه زيات كسان مړه او 12,860 ژوبل شوي دي۔ دې ووئيل د بارانونو او سېلاب د لاسه 3 کروړه 30 لکه نه زيات وګړي ځپلې شوي او 20 لكه نه زياتو كورونو ته زيان رسېدلے دے۔ دې ووئيل په يو وخت كښې درېمه برخه پاكستان په سېلاب كښې ډوب ؤ ۔ دې ووئيل د سېلاب د اوبو په وتلو كښې به څو مياشت لګي۔ دې ووئيل د سېلاب د ولاړو اوبو د لاسه د رنحونو خپرېدو يوه بله ستونزه په هېواد كښې رامخې ته شوې ۔ يواځې د سندھ په سېلاب ځپليو سيمو كښې د تېرو 24 ساعتو په مهال لګولې شوو هېلت كېمپونو ته 78,000 رانځوران راغلي ۔ دې ووئيل ځينې ښارونه او كلي اوس هم په څو فټه اوبو كښې ډوب دي ٬ د دې سېلاب د لاسه د معاشي زيان اندازه د 30 بلين ډالره نه زياته لګولې شوې ۔ وفاقي وزيرې ووئيل د ماحولياتي اثرات به تر پاكستان محدود نه پاتې كېږي ولې چې د ماحولياتي اثرات او تباهۍ كوم حد نه وي۔
