اسلام آباد 30 ستمبر (اے پي پي) د خارجه دفتر وياند عاصم افتخار احمد وئيلي دي وزيراعظم محمد شهباز شريف د نيويارك خپلې اوسنۍ دورې په مهال پاكستان كښې د سېلاب له امله رامنځته شوې تباهۍ پلو د نړيوالو مشرانو پام ګرځولې، وزيراعظم د بېلا بېلو هېوادونو مشرانو سره خپلو خبرو كښې د موسمياتي بدلون لاره نيولو او د موسمياتي اثراتو د لاسه د پرمختګ كوٶنكو هېوادونو د شوي زيان ازالې لپاره د نړيوال اقدام كولو په حاجت زور راوړې۔ د جمعې په ورځ د پرېس بريفنګ په مهال وياند ووئيل د فرانس صدر٬ د ملګرو ملتونو عمومي سېكتر٬ د آئي اېم اېف منېجنګ ډائرېکټر، د نړيوال بېنك صدر او د ځينې نورو اهمو مشرانو پشمول د امريكې د موسمياتي بدلون خاص استازي جان کېري د پاكستان نړيوال ملاتړ فعاله كولو كښې په مرسته كولو اتفاق كړے دے۔ وياند ووئيل په يو نړيوال كنفرنس كښې به د سېلاب ځپلو سيمو بيا رغونې او بحالۍ پلو پام ګرځولې شي او د دې نه وړاندې به د زيانونو او د ضرورتونو جاج اخستو سره يوه بشپړه منصوبه جوړولې شي۔ ده ووئيل وزيراعظم عمومي اسمبلۍ ته خپله وېنا كښې نړيوالو مشرانو سره په خبرو كښې پاكستان او نړيوالې ورورولۍ لپاره د تشويش په يو شمېر مسئلو هم د پاكستان د نقطه نظر خاكه وړاندې كړې۔ د خارجه دفتر وياند ووئيل د هند په غېر قانوني توګه د قبضه كړې شوي جمو و كشمير سنګين صورتحال پلو د نړۍ پام راګرځولو سره ده ووئيل دا شخړه د پاكستان او هند ترمېنځه د اړي ګړي بنيادي سبب دے ۔ ده ووئيل هند له خبرې اترې بيا پېل كولو او اړې ګړې كمولو لپاره د پنځم اګست كال 2019 څخه خپل غېر قانوني او يو اړخيز اقدامات بېرته اخستل پكار دي۔ وياند ووئيل وزيراعظم هند ته امن لپاره د كار كولو بلنه وركولو سره ووئيل دواړو هېوادونو له به د بې وزلۍ ، رنځونو او د لوږې ختمولو پلو پام ګرځول وي۔ وياند ووئيل خارجه وزير په نيويارك كښې د او آئي سي د خارجه وزيرانو كلنې غونډې سره سره د جي 77 او د چين د خارجه وزيرانو د كلنې غونډې هم مشري كړې۔ وياند ووئيل خارجه وزير يو شمېر خارجه وزيرانو سره دوه اړخيزه ملاقاتونه هم كړي او د ميډيا نه علاوه تھنك ټينك سره ئې خبرې اترې كړې دي۔ وياند ووئيل خارجه وزير بلاول بھټو زرداري او وزير مملکت حنا رباني کھر په واشنګټن كښې د امريكې خپل همڅنګ انټوني بلنكن سره د نتيجې وړ ملاقات كړې چې پكښې امريكې د پاكستان سېلاب ځپليو لپاره اضافي لس مېليونه ډالره اعلان كړي چې ورسره د امريكې مجموعي مرسته 66.1 مېليونه ډالرو ته رسېدلې ده۔ وياند ووئيل وزيراعظم د روانې مياشت په نيمائي كښې په سمرقند كښې د شنګھائي مرستې تنظيم د غړو هېوادونو د مشرانو په غونډه كښې د موسمياتي بدلون تباهۍ مخنيوي لپاره د اجتماعي هلو ځلو په ضرورت زور راوړې۔ وياند ووئيل دا خبره ډېر اندېښمنه ده چې هندي قابض ځواكونو په تېره يوه اوونۍ كښې د مقبوضه كشمير په كولګام او كپواړه سيمو كښې نور پنځه كشميري ځوانان بې ګناه او په جعلي مقابلو كښې شهيدان كړي دي، نړيواله ورورولي دې د دې صورتحال نوټس واخلي، وياند د حريت مشرانو پشمول د كشميري سياسي بنديانو د خوشې كولو هم مطالبه وكړه۔ وياند ووئيل مونږ په مقبوضه كشمير كښې د هند د غېر قانوني اقداماتو او د جواز نه لرونكو معاشي بريدونو هم غندنه كوٶ چې څرګندونه ئې د هندي قابض ځواكونو لخوا په كشمير كښې د تازه مېوو د ټركونو ايسارولو څخه څرګندېږي۔ وياند ووئيل دا د كشمير د ميوو د سوداګرو غېر اعلانيه ناكه بندي ده چې مقصد ئې د مقبوضه جمو و كشمير معيشت ويجاړول دي او كشميريانو ته د خپلواكۍ حق لپاره د روانو هلو ځلو سزا وركول دي
