اسلام آباد۔3اکتوبر(اے پی پی) پاکستان تے ملائیشیا تجارت، سرمایہ کاری، دفاع، زراعت اتے ٻئے شعبیں اچ ݙوپاسے تعاون ودھاوݨ تے اتفاق کیتے جݙاں جو غزہ تے کشمیر سودھے علاقائی امورتے آپݨے پختہ موقف دا اعادہ کیتے ۔ایں ڳالھیں وزیراعظم محمد شہباز شریف تے ملائیشیا دے وزیراعظم انورابراہیم وچال وزیراعظم ہاؤس اچ ون آن ملاقات اتے وفد دی سطح تے ڳالھ مہاڑ دے بعد مشترکہ پریس کانفرنساچ آکھیاں ڳئن۔ ݙوہیں وزرائے اعظم میڈیا کوں ݙسائے انھاں دی ڳالھ مہاڑ اچ ݙوپاسے مفاد دے ٻہوں سارے شعبیں دے نال نال فلسطین تے کشمیر سودھے علاقائی اتے بین الاقوامی امور اچ ݙوپاسے تعاون تکڑا کرݨ تے توجہ ݙتی ڳئی ۔ ݙوہیں رہنماواں ݙوطرفہ تجارت ودھاوݨ دیاں کوششاں دے سلسلے اچ ایں ڳالھ تے اتفاق کیتے جو پاکستان ملائیشیا کوں سالانہ 200 ملین ڈالر مالیت دا حلال گوشت اتے 100,000 میٹرک ٹن باسمتی چاول برآمد کریسی ۔ملائیشیا تے پاکستان وچال کل تجارت 1.4 بلین امریکی ڈالر رہی جیں اچ پام آئل، ملبوسات، ٹیکسٹائل، کیمیکل اتے کیمیکل تے مبنی مصنوعات ،الیکٹرک تے الیکٹرانک مصنوعات شامل ہن۔ واضح رہے جنوبی ایشیائی ملکاں اچ پاکستان ملائیشیا دا تریجھا ساریں توں وݙا تجارتی شراکت دار اے۔وزیراعظم شہباز شریف آکھیے پاکستان دے باسمتی چاول دی برآمد تے ڳالھ مہاڑ توں علاوہ ݙوہیں فریقین پاکستان توں ملائیشیا کوں سالانہ 200 ملین ڈالر مالیت دا حلال گوشت برآمد کرݨ دے امکانات تے وی ڳالھ مہاڑ کیتی تے یقین ݙیوائے جو پاکستان معیارتے کوئی سمجھوتہ نہ کریسی ، انھاں آکھیے ملائیشیا دے وزیر اعظم پاکستان دے چاول دی درآمد اچ رکاوٹاں مکاوݨ دا یقین ݙیوائے ۔وزیراعظم شہباز شریف آکھیے تجارت تے سرمایہ کاری اچ ودھارے دے علاوہ دفاع، سیاحت، زراعت، گرین انرجی، ہنر مند افرادی قوت اتے نینگراں کوں بااختیار بݨاوݨ دے شعبیں اچ مزید تعاون دے رستے ڳولݨ سانڳے شاندار اجلاس تھئے۔انہاں آکھیے فریقین ایں ڳالھ تے متفق ہن جو ݙوہیں ملک سانجھے طور تے تجارت تے سرمایہ کاری اچ تعاون ودھاوݨ دی جستجو کریسن تاں جو ݙوہیں ملکاں اے روشن مستقبل کوں یقینی بݨایا ونڄ سڳے ۔ انھاں پاکستان اتے ملائیشیا وچال دفاعی اتے سکیورٹی تعاون مزید ودھاوݨ دا یقین ݙویندے آکھیے ایں ویلھے ملائیشیا اچ تعلیم حاصل کرݨ آلے ہزاراں پاکستانی طالب عوامی سطح تے رابطے ودھاوݨ اچ مدد کریسن، ملائیشیا دی ترقی کوں انھاں سارے مسلم ملکاں سانڳے رول ماڈل دے طور تے پیش کیتا ونجݨا چاہیدے جتھاں براہ راست غیر ملکی سرمایہ کاری اتے برآمدات اچ ودھارا تھیندا پئے ، انھاں آکھیے جو ݙوہیں فریقین غزہ دی ݙراوݨ آلی صورت حال تے وی ڳالھ مہاڑ کیتی جتھاں نشوم ٻال ، مرد تے تریمتاں شہید تھیندیاں پئن، اسرائیلی افواج دی طرفوں غیر معمولی نسل کشی تے قتل عام دے تحت غزہ اچ شہر ڈھائے ویندے پئن جݙاں جو ݙوہیں فریقاں وختی جنگ بندی تے زور ݙتے ۔ وزیراعظم شہباز شریف آکھیے ݙوہیں فریقین مسئلہ کشمیر تے ڳالھ مہاڑ کیتی جتھاں گزریل کئی ݙھاکیں توں وݙیاں قربانیاں ݙیوݨ دے باوجود لوکاں کوں انھاں دے حق خودارادیت توں محروم رکھیا ویندا پئے ، ہزاراں کشمیریاں کوں شہید کیتا ڳئے ٻہوں تھرڈ کلاس جیلاں اچ نظربند ہن تے انھاں کوں سخت سزا ݙتی ویندی پئی اے ۔ انھاں امید ظاہر کیتی جو اقوام متحدہ دی سلامتی کونسل دی قرارداداں اتے کشمیری عوام دی امنگاں دی روشنی اچ کشمیریاں کوں وختی انھاں دا حق خودارادیت مل ویسی۔وزیراعظم انور ابراہیم آکھیے ݙوہیں فریقاں ٻہوں امور تے اتفاق تے فیصلیں تے تکھے عمل درآمد یقینی بݨاوݨ سانڳے اڄوکے مہینے کوالالمپوراچ تھیوݨ آلے مشترکہ کمیشن دے اجلاس اچ ایں تے ڳالھ مہاڑ کیتی ویسی ۔ انھاں یقین ݙیوائے ݙوہیں ملکاں وچال اقتصادی تعاون تکڑا بماوݨ سانڳے وختی کراچی اچ ملائیشین ٹریڈ آفس کھولیا ویسی ، ملائیشیا آئی ٹی، مصنوعی ذہانت اتے سیمی کنڈکٹر سودھے مختلف شعبیں اچ مزید ہنر مند افرادی قوت دی ڳول وچ ہے تے پاکستان وی ایہو جی ہنرمند افرادی قوت دا ذریعہ بݨ سڳدے۔ ملائیشیا دے وزیر اعظم آکھیے ملائیشیا پاکستان توں ھک لکھ ٹن باسمتی چاول درآمد کرݨ تے رضامندی ظاہر کیتی اے ۔انورابراہیم اقوام متحدہ دی جنرل اسمبلی اچ وزیراعظم شہباز شریف دے خطاب دی تعریف کیتی تے جیں اچ انھاں غزہ دا مقدمہ موثر اندازاچ لڑیے ۔ انھاں اسرائیل دی طرفوں فلسطینیاں دی نسل کشی اتے اسرائیل دی طرفوں مشرق وسطیٰ اچ کشیدگی اچ ودھارے دے خلاف پاکستان دے سخت موقف دی وی تعریف کیتی ، انھاں آکھیے غزہ تے لبنان اچ جاری جارحیت ݙوہیں ملکاں وچال جنگ کائنی بلکہ اے بین الاقوامی نظام دی خلاف ورزی اے ۔انھاں عالمی برادری دی غیر فعالیت تے وی سوال چاتے۔ وزیر اعظم انور ابراہیم ایں ڳالھ دا اعادہ کیتے جو ملائیشیا کشمیرتے اقوام متحدہ دی سلامتی کونسل دی قرارداداں تے کاربند اے اتے جھیڑے دے دوستانہ حل تے یقین رکھیندے ۔ بعد اچ ݙوہیں وزرائے اعظم مفاہمت دی یادداشتاں (ایم او یوز) تے تعاون دی ھک دستاویز دے تبادلے دی تقریب اچ شرکت کیتی۔ٹریڈ ڈویلپمنٹ اتھارٹی آف پاکستان (ٹی ڈی اے پی) اتے ملائیشیا ایکسٹرنل ٹریڈ ڈویلپمنٹ کوآپریشن وچال تجارتی تعاون تے مفاہمت دی یادداشت اتےپاکستان-ملائیشیا بزنس کونسل (پی ایم بی سی) اتے ملائیشیا-پاکستان بزنس کونسل (ایم پی بی سی) وچال حلال تجارت اچ تعاون سانڳے ایم او یو دا تبادلہ کیتا ڳئے ۔ پاکستان ٹیلی کمیونیکیشن اتھارٹی (پی ٹی اے) اتےملائیشین کمیونیکیشن اینڈ ملٹی میڈیا کمیشن (ایم سی ایم سی) وچال تعاون دی ھک دستاویز تے وی دستخط کیتے ڳئن ۔ بعد اچ وزیر اعظم انور ابراہیم معروف شاعر علامہ محمد اقبال دی تصانیف وی پیش کیتیاں جنہاں دا بہاسا میلیو اچ ترجمہ کیتا ڳئے ۔ انہاں آپݨی کتاب “ایشیائی نشاۃ ثانیہ” دی اردو کاپی وی پیش کیتی۔
