اسلام آباد۔27دسمبر (اے پی پی) د استحکام پاکستان ګوند مشر او د مواصلات وفاقي وزير عبدالعلیم خان د الوتکې په پېښه د آذربائیجان سفیر خضر فرهادوف سره غمرازي ښكاره كړې ده۔ د جمعې په ورځ وفاقي وزير په اسلام آباد کښې د آذربائیجان سفارت ته لاړ، چرته چې هغه سفیر خضر فرهادوف سره د الوتکې په پېښه كښې د وګړو په ځاني زيان غمرازي ښكاره كړه۔ ده ووئيل مونږ د غم دړد په دې سخت وخت كښې د آذربائیجان خلقو سره د خواخوږۍ څرګندونه كوؤ۔ ده ووئيل پاكستان او آذربائیجان د اسلامی وروڼو هیوادونو په توګه تل د یو بل په غم او خوشحالی کښې شريك پاتې شوي۔ ده دعا وكړه چې پاك پروردګار دې پېښه كښې په حق رسېدليو له د خپل رحم په پلو كښې ځاے او غمجنيو كورنيو له د زغم توفيق وركړي۔ ده په پېښه كښې ژوبل شوو له د زر روغتيا دعا هم وكړه۔ دغسې د آذربائیجان سفیر خضر فرهادوف سفارت ته په تللو او د خواشيني په څرګندولو د وفاقي وزير مننه وكړه۔
