اسلام آباد۔6جون (اے پی پی) وزیراعظم محمد شہباز شریف آئی ٹی دے شعبہ اچ فکسڈ ٹیکس رجیم ڳھن آوݨ، نواں کاروبار شروع کرݨ آلیاں کوں خصوصی مراعات ݙیوݨ دا فیصلہ کریندیں ہوئیں آندےمالی سال دے بجٹ اچ آئی ٹی دے شعبے کیتے وݙے پیکیج دی تیاری دی ہدایت کیتی اے۔ وزیراعظم آفس توں جاری بیان موجب وزیراعظم شہباز شریف دی صدارت انفارمیشن ٹیکنالوجی دے فروغ بارے اعلیٰ سطح دا اجلاس تھیا جئیں اچ آئی ٹی برآمدات ودھاوݨ ، آئی ٹی دے شعبہ اچ فکسڈ ٹیکس رجیم ڳھن آوݨ دا فیصلہ کیتا ڳیا۔ وزیراعظم فکس ٹیکس رجیم کیتے کمیٹی ٻݨا ݙتی اے اتے ہدایت کیتی جو کمیٹی فوری طور اپݨی سفارشات پیش کرے۔ اجلاس اچ آئی ٹی دے شعبے اچ نواں کاروبار شروع کرݨ آلیاں کوں خصوصی مراعات ݙیوݨ دی اصولی منظوری ݙتی ڳی۔ اجلاس اچ جدید ٹیکنالوجی اتے آئی ٹی دے ذریعے کاروبار اتے تجارت دے ودھارے تے خصوصی رعایت ݙیوݨ، نینگراں کوں اپݨا کاروبار شروع کرݨ دی حوصلہ افزائی کیتے وی اقدامات دا فیصلہ کیتا ڳیا۔ وزیراعظم خصوصی ٹریننگ، آئی ٹی زونز ٻݨاوݨ دے فیصلے دی وی منظوری ݙتی۔ وزیراعظم ٻاہرلے ملک آئی ٹی سیکٹرز دے روڈ شوز کراوݨ اتے ایں شعبے اچ سہولتاں ݙیوݨ دی ہدایت کیتی۔ وزیراعظم آکھیا جو حکومت بجٹ اچ نینگراں دی آئی ٹی شعبے دی پیشہ وارانہ تربیت تے وݙی رقم خرچ کریسی، ایں ملک ملک اچ 45 ہزار نینگراں کوں آئی ٹی ہنر دی تربیت ݙتی ویندی پی اے۔ حکومت آندے بجٹ اچ ہک لکھ نینگراں کوں میرٹ تے لیپ ٹاپس ݙیسی۔ وزیرِ اعظم آئی ٹی شعبے کوں آندے سال اپݨی برآمدات کوں 4.5 ارب ڈالر تئیں ودھاوݨ دا ہدف ݙے ݙتا ۔ وزیرِ اعظم آئی ٹی تے ٹیلی کام سیکٹر دی ترقی کیتے بجٹ تجاویز کوں جلدی چھیکڑی شکل ݙے تے پیش کرݨ دی ہدایت ݙتی۔ اجلاس اچ وفاقی وزراء اسحاق ڈار، سید امین الحق، مریم اورنگزیب، مشیرِ وزیرِ اعظم احد خان چیمہ، وزیرِ مملکت عائشہ غوث پاشا، معاونینِ خصوصی طارق باجوہ، جہانزیب خان، طارق پاشا، شزا فاطمہ خواجہ، سینیٹر افنان اللہ، گورنر اسٹیٹ بنک، چیئرمین ایف بی آر، متعلقہ اعلی حکام شریک تھیے۔ ایندے علاوہ علاوہ آئی ٹی دے شعبے توں معروف ماہرین بشمول آصف پیر، زوہیب خان، نصیر اختر، اتے ٹیلی کام شعبے توں حاتم باماترف سی ای او پی ٹی سی ایل، مدسر حیسن وائس پریزیڈنٹ جاز اوت کمال احمد ڈپ٥ی سی ای او ٹیلی نار وی شریک تھیے۔
