اسڪردو – 16 ڊسمبر (اي پي پي) وزيراعظم عمران خان چيو آهي ته ملڪ جي پوئتي پيل ۽ نظرانداز ڪيل علائقن جي ترقي موجوده حڪومت جي ترجيح آهي، اسڪردو انٽرنيشنل ايئرپورٽ ۽ بهتر رستن جي تعمير سان مقامي ۽ عالمي سياحن کي سهولت ملڻ سان گلگت بلتستان ۾ سياحت کي وڌيڪ فروغ ملندو ۽ علائقي ۾ اقتصادي خوشحالي ايندي، پاڪستان جي رنگارنگ ۽ دلڪش ماڳ رکندڙ سياحت پاڪستان جو اثاثو بڻجي سگهي ٿي، سياحت جي شعبي ۾ گلگت بلتستان مان ساليانو 30 کان 40 ارب ڊالر حاصل ڪري سگهجن ٿا ۽ مقامي ماڻهن کي روزگار جا وسيع موقعا به ميسر ايندا.
اسڪردو انٽرنيشنل ايئرپورٽ ۽ اسٽريٽجڪ جگلوٽ اسڪردو روڊ جي افتتاح جي موقعي تي عوامي ميڙاڪي کي خطاب ڪندي وزيراعظم چيو ته ڪو به ملڪ ان وقت تائين ترقي نٿو ڪري سگهي جيستائين پوئتي رهجي ويل علائقن کي مٿي نٿو کنيو وڃي، جڏهن اقتدار سنڀاليو ته ان وقت اسان جي ڪوشش هئي ته گلگت بلتستان، بلوچستان، اڳوڻي فاٽا، اندروني سنڌ ۽ ڏکڻ پنجاب سميت ڏورانهن ۽ پٺتي پيل علائقن کي ٻين ترقي يافته علائقن جي برابر آهيون، هتي غربت جي هيٺن لڪير کان ماڻهن کي ڪڍون ڇو ته جنهن معاشري ۾ غريب غريب تر ۽ امير امير تر هجي اها معاشي ناانصافي آهي، ڪنهن معاشري ۾ خوشحالي جو اندازو اتي جي امير ماڻهن جي زندگي کي ڏسي نه پر غريبن جي رهڻي ڪهڻي کي سامهون رکندي لڳايو ويندو آهي، وزيراعظم چيو ته ملڪ مان غربت جي خاتمي لاءِ پوري طرح ڪوششون ڪري رهيا آهيون، خيبرپختونخوا ۾ جڏهن 2013ع ۾ اسان جي حڪومت آئي ته ان وقت اتي سڀ کان وڌيڪ دهشتگردي جي ڪري تباهي ٿي هئي، ماڻهن جي حفاظت جي ذميدار پوليس جا پنهنجا 700 اهلڪار شهيد ٿيا. يو اين ڊي پي پنهنجي رپورٽ ۾ ٻڌايو ته 2013ع کان 2018ع تائين اسان جي حڪومت جي دوران خيبرپختونخوا ۾ تيزي سان غربت گهٽ ٿي، اسان جي ڪوشش آهي ته اسان جي حڪومت جا پنج سال پورا ٿين ته پوئتي رهجي ويل علائقا تعمير ۽ ترقي ۾ مٿي اچن.
وزيراعظم چيو ته کيس خوشي اهي ته اسڪردو ۾ انٽرنيسنل ايئرپورٽ بڻجي ويو آهي، وقت ثابت ڪندو ته اسڪردو ايئرپورٽ جي انٽرنيشنل بنجڻ سان هتي جي ماڻهن جي زندگين ۾ نمايان تبديلي ايندي. هن چيو ته مون سڄي دنيا جا حسين ماڳ ڏٺا آهن ۽ يقين سان چئي سگهان ٿو ته دنيا جي سڀ کان خوبصورت پهاڙي سلسلو گلگت بلتستان ۾ آهي، پهرين انهن علائقن ۾ اچڻ مشڪل هو، ٻاهرين ملڪن مان ايندڙ سياح پهرين ڪراچي يا اسلام آباد ايندا هئا، جتي موسم جي خرابي جي ڪري اڏامون ڪيترائي ڏينهن دير جو شڪار ٿينديون هيون پر هاڻي ٻاهرين ملڪن مان سڌ سنئون اڏامن سان وڏي تعداد ۾ سياح هتي اچي سگهندا، هن چيو ته رستن جي بهتر ٿيڻ سان ملڪ اندران گرم علائقن جا ماڻهو به هتي جو رخ ڪندا، وزيراعظم چيو ته 30 سال پهرين اسڪردو جگلوٽ روڊ تي سفر ڪيو تڏهن اهو رستو انتهائي خطرناڪ هو، وزيراعظم اين ايڇ اي ۽ ايف ڊبليو او کي مشڪل ۽ خطرناڪ روڊ ٺاهڻ جي خراج تحسين پيش ڪيو جنهن سان اسڪردو کان گلگت جو سفر 8 ڪلاڪن مان گهٽ ٿي 3 ڪلاڪ رهجي ويندو.وزيراعظم ڪم جي دوران شهيد ٿيندڙ ايف ڊبليو او جي فوجي جوانن کي به خراج عقيدت پيش ڪيو،
وزيراعظم چيو ته سياحت پاڪستان جو اثاثو بڻجي سگهي ٿو، گلگت بلتستان جي مقابلي ۾ سوئٽزرلينڊ جي ايراضي اڌ آهي پر اهو سياحت مان ساليانو 70 ارب ڊالر ڪمائيندو آهي جڏهن ته پاڪستان جي سالياني ڪل برآمدات 30 ارب ڊالر تائين آهي، وزيراعظم چيو ته هو ڪيترن ئي ماڻهن سان مليو آهي جيڪي سوئٽزرلينڊ ۽ آسٽريا کان هتي آيا ۽ هو پاڻ چوندا آهن ته سوئيٽزرلينڊ ۽ آسٽريا انهن علائقن جي برابر نه آهن، هتي ٻنهي موسمن ۾ سياحت جا موقعا موجود آهن، وزيراعظم چيو ته هتي کان آزاد ڪشمير کي ملائيندڙ روڊ سان فاصلو وڌيڪ گهٽ ٿيندو. آسانيون ٿينديون ته سياحت کي فروغ ملندو، هن گلگت بلتستان جي وڏي وزير کي هدايت ڪئي ته هو علائقي جي زمين جو پوري طرح ڌيان رکي، ٻاهران ماڻهو هتي اچي مهانگي اگهه تي زمين خريد ڪندا. هتي پهرين ئي زمين گهٽ آهي، هتي ريزارٽ ٺاهڻا آهن ان جي لاءِ زمين رکو ڇو ته جيڪڏهن اسان سوچ سمجهه کان ڪم وٺون ته صرف گلگت بلتستان مان 30 کان 40 ارب ڊالر سياحت مان حاصل ڪري سگهون ٿا، وزيراعظم چيو ته پاڪستان ۾ مذهبي سياحت جا به وسيع موقعا آهن، گنڌارا تهذيب جا آثار، ڪٽاس راج سميت هندوئن جي لاءِ سياحتي ماڳ موجود آهن، صوفي ازم جي لاءِ وڏيون وڏيون درگاهون موجود آهن، وزيراعظم چيو ته ان کانسواءِ پاڪستان وٽ وسيع سامونڊي حدون موجود آهن، اتي ريزارٽ بڻجي سگهن ٿا، اسان هن ملڪ کي جيڪي جيڪي نعمتون ڏنيون آهن انهن مان اڃان فائدو ناهي کنيو ويو. وزيراعظم چيو ته مقامي ۽ عالمي سطح تي ان علائقي ۾ سياحت جي فروغ سان مقامي ماڻهن کي فائدو حاصل ٿيندو، ماڻهن کي روزگار لاءِ ڪيڏانهن ٻاهر وڃڻو نه پوندو پر ٻاهران ماڻهو روزگار جي ڳولا ۾ هتي ايندا. وزيراعظم چيو ته هتي بجلي جو تمام وڏو مسئلو آهي جنهن جي لاءِ وڏي وزير هائيڊرو اليڪٽرڪ منصوبي جو اعلان ڪيو آهي، هن وڏي وزير کي چيو ته هو ڏورانهن علائقن جي ماڻهن جي سهولت لاءِ وڌيڪ ضلعن جون تجويزون ڏي، وزيراعظم چيو ته هن وقت سڄي دنيا کي مهانگائي درپيش آهي، ڪورونا لاڪ ڊائون جي ڪري سپلائي لائن رڪجي وئي، واپار بند ٿي ويو،
هن چيو ته حڪومت غريب طبقي جي مشڪلاتن کي نظر ۾ رکندي اٽي، گيهه ۽ دالين تي 50 هزار کان گهٽ آمدني وارن ماڻهن کي 30 سيڪڙو رعايت ڏيڻ جي لاءِ احساس راشن ڪارڊ جو منصوبو کڻي آئي آهي، ان کانسواءِ هر شهري کي هيلٿ انشورنس لاءِ صحت ڪارڊ ڏئي رهي آهي، امير ملڪن ۾ به هر شهري کي اها سهولت دستياب نه آهي، گلگت بلتستان، آزاد ڪشمير ۽ خيبرپختونخوا ۾ هر گهراڻي کي اها سهولت ميسر آهي، پنجاب ۾ ايندڙ ٽن مهينن ۾ اها سهولت ميسر اچي ويندي. ان سان هڪ گهراڻي کي 10 لک روپين تائين جي هيلٿ انشورنس ميسر ايندي جنهن سان هو ڪنهن به سرڪاري ۽ پرائيويٽ اسپتال ۾ پنهنجو علاج ڪرائي سگهندا. وزيراعظم چيو ته غرب گهراڻن جي هوشيار ٻارن کي بهترين ۽ فني تعليم سان مٿي کڻي سگهون ٿا، هڪ هنرمند ماڻهو سڄي خاندان کي مٿي کڻي سگهي ٿو، اسان 20 لک خاندانن جي لاءِ اها اسڪالرشپ پروگرام شروع ڪيو آهي، ڪامياب پاڪستان پروگرام تحت 5 لک روپين تائين بنا وياج قرض هڪ خاندان جي هڪ ماڻهو کي ملندو جڏهن هڪ ماڻهو کي فني مهارت جي تعليم ڏني ويندي، ان کانسواءِ گهر ٺاهڻ جي لاءِ 27 لک روپين تائين بنا وياج قرض ڏنو پيو وڃي،
وزيراعظم چيو ته پاڪستان جي تاريخ ۾ پهريون ڀيرو 47 ارب روپين جون اسڪالرشپس ڏنيون پيون وڃن. ان پروگرام جي هو پاڻ مانيٽرنگ ڪندو ته جيئن ميرٽ تي اهي اسڪالرشپ ملي سگهن، وزيراعظم سيڪريٽريٽ ۾ مستحق، هوشيار شاگرد پننجي تعليم جاري رکڻ لاءِ آن لائين درخواستون ڏئي سگهندا. هن شديد سردي جي باوجود وڏي تعداد ۾ جلسي گاهه ۾ ماڻهن جي شرڪت تي انهن جو ٿورو ادا ڪيو، ان کان اڳ گلگت بلتستان جي وڏي وزير خالد خورشيد به جلسي کي خطاب ڪيو.
