اسلام آباد – 07 – آڪٽوبر (اي پي پي) پاڪستان گذريل رات ڪراچي ايئرپورٽ ويجهو ٿيندڙ ڪڌي دهشتگرد حملي جي شديد مذمت ڪري ٿو جنهن ۾ ٻن چيني انجنيئرن جون جانيون ضايع ٿيون ۽ هڪ زخمي ٿيو. پرڏيهي آفيس جي ترجمان پاران جاري بيان ۾ چيو ويو آهي ته اسان چيني ۽ پاڪستاني متاثرين جي خاندانن سان گهري تعزيت ۽ همدرديءَ جو اظهار ڪريون ٿا ۽ زخمين جي جلد صحتيابي لاءِ دعاڳو آهيون. بيان موجب دهشتگردي جي اها ڪڌي ڪارروائي نه رڳو پاڪستان پر پاڪستان ۽ چين جي پائيدار دوستي تي به حملو آهي. اسان مجيد برگيڊ سميت ان بزدلاڻي حملي جي ذميوارن کي انصاف جي ڪٽهڙي ۾ آڻڻ جي لاءِ پرعزم آهيون. ترجمان پنهنجي بيان ۾ وڌيڪ چيو ته پاڪستان جي سيڪيورٽي ۽ قانون لاڳو ڪندڙ ادارا ڏوهارين ۽ انهن جي سهولتڪارن کي پڪڙڻ ۾ ڪا ڪسر نه ڇڏيندا ۽ وحشياڻي فعل جا مرتڪب سزا کان نٿا بچي سگهن. پرڏيهي وزارت ڪوآرڊينيشن جي لاءِ چيني سفارتخاني سان ويجهي رابطي ۾ آهي. بيان موجب پاڪستان ۽ چين ويجها حصيدار ۽ ڀائر آهن جيڪي گڏيل احترام ۽ گڏيل قدرن جي ٻنڌڻن ۾ ٻڌل آهن. ترجمان چيو ته پاڪستان چيني شهرين، منصوبن ۽ پاڪستان ۾ ادارن جي حفاظت ۽ سلامتي جي لاءِ پنهنجي اڻٿڪ عزم جو ورجاءُ ڪري ٿو ۽ دهشتگرد قوتن کي شڪست ڏيڻ جي لاءِ پنهنجي چيني ڀائرن سان گڏجي ڪم ڪندو رهندو.
