اسلام آباد۔15اکتوبر(اے پی پی) د تاجكستان وزيراعظم كوهر رسول زاده د ايس سي او غونډه كښې ګډون لپاره د نهې په ورځ پاكستان ته راورسيد۔ د اسلام آباد په نړيوال هوائي ډګر د تجارت وفاقي وزير جام كمال خان او نورو اعلی چارواكو د هغه رېډ کارپټ هركلے وكړو۔ په دې موقعه روايتي جامې اغوستې ماشومانو ګران مېلما ته ګلدستې وړاندې كړې۔ د تاجك وزيراعظم د رارسېدو په موقعه د تجارت وزير او د مېلمه وزيراعظم ترمينځه د خېر سګالۍ كلماتو څرګندونه هم وشوه۔ په پاكستان كښې د تاجكستان سفارتخانې اعلی سفارتي چارواكي هم په دې موقعه موجود وو۔ د تاجكستان د وزيراعظم د پاكستان دوره د دواړو هېوادونو ملګرتيا ته وده وركولو او سيمه اييز همكارۍ لپاره يو مهم ګام دے۔ د اېس سي او غونډه كښې د نړيوالو لارښودو ګډون سره د سيمه اييز امن هيلې زياتې شوي دي۔
