سیالکوٹ۔28مئی(اے پی پی):وزیر دفاع خواجہ محمد آصف آکھیے سیاسی جماعتاں یا سیاسی قائدین ساݙی ریڈ لائن کائنی بلکہ ایں وطن دی مٹی تے ساݙے شہدا ساݙی ریڈ لائن ہووݨی چاہیدے جنہاں وطن عزیز دے دفاع اتے ساݙی حفاظت کیتے آپݨی جاناں دے نذرانے پیش کرݨ توں وی گریز نی کیتا ، اڄ توں 25 سال پہلے 28 مئی دے ݙینھ پاکستان ایٹمی طاقت بݨیا تے ساݙے قائد سابق وزیراعظم محمد نواز شریف ایٹمی دھماکے کرتے ملکی دفاع کوں ناقابل تسخیر بݨا ݙتا، ایٹمی طاقت بݨݨ دی وجہ توں ساݙا دفاع ٻہوں تکڑا تھی ڳئے ، اے ڳالھ انہاں سیالکوٹ اچ ھک نجی کالج دے نویں کانووکیشن دے موقع تے بطور مہمان خصوصی خطاب کریندے ہوئیں آکھی اے ، انہاں آکھیے ایجھے تعلیمی پروگرام اچ شرکت میں کیتے اعزاز اتے فخر دی ڳالھ اے جتھاں ساݙی قوم دیاں دھیریں اپݨی تعلیمی ڈگریاں مکمل کرݨ دے بعد اڳوں ودھدے ہوئے آپݨی عملی زندگی دا آغاز کرݨ ویندی پئی اے ، میں آپݨی انہاں ساریاں دھیریں کوں تے انہاں دے والدین کوں انہاں دی کامیابی تے دلوں مبارخ ݙینداں تے دعا کرینداں جو اللہ تعالیٰ انہاں کوں مستقبل اچ وی ڈھیراں کامیابیاں نال نوازن۔ انہاں آکھیے فقط بی اے ، ایم اے دی ڈگری حاصل کرگھنݨ ساݙا مقصد نی ہووݨا چاہیدا بلکہ انہاں اچ سارے طالبعلماں کوں بامقصد تعلیم دے حصول دا درس ݙینداں جو کیوں جو بامقصدتعلیم دا حصول ہی اساکوں اڳوں ودھݨ کیتے ممدو معاون ثابت تھی سڳدے تے ایں توں اساں درپیش چیلنجزنال نبݨ سڳدوں،۔ انہاں آکھیے سابق وزیراعظم ذوالفقار علی بھٹو ملک کوں ایٹمی طاقت بݨاوݨ کیتے شروعات کیتی تے تاں جو اینکوں پاکستان مسلم لیگ (ن) توڑ پڄایا ، ملکی ایٹمی اثاثیں اچ افواج پاکستان دا وی انتہائی اہم کردار رہیے اتے ساݙی پاک فوج اڄ وی اپݨی سرحداں دی حفاظت دے نال نال انہاں ایٹمی اثاثیں دی وی حفاظت کریندی پئی اے جیں تے انہاں کوں خراج تحسین پیش کریندوں ۔
