اسلام آباد۔4جولائی(اے پی پی) وزیر مملکت انفارمیشن ٹیکنالوجی وٹیلی کمیونیکیشن شزہ فاطمہ خواجہ آکھیے پاکستان تے چین وچال سدا بہار سٹریٹجک شراکت داری انفارمیشن ٹیکنالوجی دے شعبے اچ تعاون دے بے مثال موقع ݙیندی اے، ݙوہیں ملکاں وچال تکنیکی تبادلیں تے تعاون تکڑا بݨاوݨ تے کٹھے رل تے بہتر ڈیجیٹل مستقبل آلے پاسے ودھݨ چاہندن ا۔ اے ڳالھ انہاں دورہ چین اچ چائنا ڈاٹ کام کوں انٹرویو وچ آکھی اے ۔ شزہ فاطمہ خواجہ آکھیے گلوبل ڈیجیٹل اکانومی کانفرنس بامعنی تعاون ودھاوݨ سانڳے ݙوہیں ملکاں دی کمپنیاں کوں مشترکہ منصوبے ڳولݨ ، بہترین طریقے دی سانجھ تے معلومات دے تبادلے سانڳےھک پلیٹ فارم ݙیسی ۔ انہاں آکھیے چین ،مصنوعی ذہانت، بگ ڈیٹا، کلاؤڈ کمپیوٹنگ اتے 5 جی ٹیکنالوجی اچ ترقی قابل ذکر اے، بیلٹ اینڈ روڈ انیشیٹو اتے ڈیجیٹل سلک روڈ منصوبہ واضح طور تے ظاہر کریندے چین ھک ݙوجھے نال منسلک اتے تکنیکی طور تے ترقی یافتہ دنیا دی تعمیر سانڳے پرعزم اے۔انہاں آکھیے اڄوکے سالاں اچ عالمی اقتصادی منظر نامہ تے ڈیجیٹل انقلاب آئے، انفارمیشن ٹیکنالوجی دے شعبے اچ ترقی معاشی ترقی، اختراع تے سماجی تبدیلی سانڳے سنگ بنیاد بݨ ڳئی اے ، پاکستان تے چین ݙوہیں ایں شعبے دی صلاحیت کوں منیندن تے ایندی صلاحیت توں فیدہ چاوݨ اچ پیشرفت کیتی اے۔ پاکستان دا انفارمیشن ٹیکنالوجی دے شعبہ دا معاشی ترقی اچ اہم کردار اے ۔ پاکستان آؤٹ سورسنگ سانڳے ساریں توں پہلے پرکشش منزل اے۔ حکومت پاکستان سافٹ ویئر ایکسپورٹ بورڈ (پی ایس ای بی) دے ذریعے آئی ٹی انڈسٹری کوں فعال طور تے سپورٹ کریندی اے ایں توں انڄ پاکستان دی آئی ٹی انڈسٹری ھک تکڑے انفراسٹرکچر توں فیدہ چیندی اے جیں اچ 100 توں ودھ سافٹ ویئر ٹیکنالوجی پارکس تے خصوصی ٹیکنالوجی زون شامل ہن۔ اے سہولتاں جدت تے ترقی سانڳے سازگار ماحول ݙیندن۔شزہ فاطمہ خواجہ آکھیے پاکستان تے چین وچال سدا بہار سٹریٹجک شراکت داری انفارمیشن ٹیکنالوجی دے شعبے اچ تعاون دے بے مثال موقع ݙیندن پاک چین شراکت داری تعاون اتے سانجھی ترقی دی طاقت اے ایندے اچ مصنوعی ذہانت، سائبر سکیورٹی، ای کامرس یا ڈیجیٹل انفراسٹرکچر اچ ، سانجھے منصوبیں معلومات دے تبادلے، نیٹ ورکنگ دے موقع اتے مہارتاں دی ترقی سانڳے ٻہوں امکان ہن ۔ سی پیک ساݙے ݙوطرفہ تعاون دا سنگ بنیاد اے اتے جوائنٹ وینچرز اتے ٹیکنالوجی تے مبنی اقدامات سانڳے موقع ݙیندے۔
